Ja til testkonsesjon for Lutelandet
11.05.2011
Norges vassdrags og energidirektorat (NVE) har i dag gjeve Lutelandet Energipark AS konsesjon for uttesting av prototype vindturbinar på Lutelandet i Fjaler kommune, med inntil 3 vindturbinar og 10 MW samla installert effekt.
Statoil, som er medeigar i Lutelandet Energipark, vurderar Lutelandet som lokalitet for uttesting av vindturbinar som skal kunne brukast i framtidige offshore vindparkar. Lutelandet har svært gode føresetnadar for å verte eit viktig testanlegg, fordi ein her kan teste offshore-teknologi utan å bli "våt på beina".
- Vi har sett på Lutelandet som godt eigna for uttesting av vindturbinar som skal kunne brukast til offshore vindkraftproduksjon, og vi er sjølvsagt glade for at NVE no har gjeve konsesjon til å kunne etablere eit slikt testanlegg, seier Stig Svalheim, styreleiar i Lutelandet Energipark.
Det er ein føresetnad at testkonsesjonen kan nytte eksisterande 22 kV kraftlinje og at netteigar stadfestar at det er tilgjengeleg kapasistet for testføremål.
NVE sin konsesjon gjev ingen føringar for vurderinga av konsesjonssøknaden for det ordinære vindkraftanlegget. Avgjerda om denne søknaden er venta i juni.
Kontakt gjerne Håkon Sandvik, dagleg leiar Lutelandet Energipark AS, på mobil 977 77 393 ved eventuelle spørsmål.
Biletet er teke av Lutelandet Offshore AS og viser Lutelandet med etablert djupvasskai. Området som kan nyttast til uttesting av offshore vindturbinar ligg på fjellryggen til venste i biletet.