– Det er fleire fordelar enn ulemper for Bremanger kommune med vindkraft på Bremangerlandet, både for oss grunneigarar, men også for heile kommunen, seier grunneigar Einar Svarstad.
I finansutvalet og formannskapsmøtet i Bremanger onsdag tok ja-sida for vindkraft i Bremanger til ordet. Grunneigarane som har skrevet under avtalen med Vestavind Kraft AS har vore stille om prosessen fram til no.
– Bremanger kommune og grunneigarar i Dalen har no ei unik sjanse til å få noko igjen for investeringane til Bremanger Vindkraft AS. Alle grunneigarane som har skreve under leigeavtalen til Vestavind Kraft AS har forplikta seg til å sette av delar av summen dei får for utleiga til felles beste for alle i Bremanger. Vi snakkar om over 100.000 kroner kvart år, som vi mellom anna tenkjer å nytte til å få bygd gatelys i Dalen, ruste opp grendehuset og andre formål som kjem eit fleirtal av folk til gode, fortel Einar Svarstad.
Grunneigar Einar Svarstad sette i dag eit ansikt på jasida til vindkraft på Bremangerlandet.
– Eg har sjølv hytte i området, og meiner at inngrepet ikkje vil få store konsekvensar. Eg meiner også at konflikten mellom bygdene i Dalen er sterkt overdrive. Eg vert provosert over at enkelte grunneigarar stiller opp i avisa og berre framhever dei negative sidene. Eg meiner det er fleire positive sider enn negative sider i denne saka. Bremanger har dei beste vindressursane på Vestlandet, og dei må vi utnytte, fortel Einar Svarstad.